انڈس گزٹ رپورٹ
کراچی: تجارتی اور کاروباری برادری کو مزید سہولیات کی فراہمی کے لیے اسٹیک ہولڈرز کی رضامندی کے مطابق شپنگ امور سے متعلق ایک ریگولیٹری اتھارٹی بنائی جائے گی۔
اس ضمن میں کراچی کسٹمز ایجنٹس ایسوسی ایشن (کے سی اے اے ) کے جنرل سیکریٹری محمود الحسن اعوان نے ایک بیان میں کہا ہے کہ وزیر اعظم کے شپنگ سیکٹر کے لئےریگولیٹری اتھارٹی کے قیام کے لئے دی جانے والی ہدایات کی روشنی میں چیئرمین کراچی پورٹ ٹرسٹ( کے پی ٹی ) سید سیدین رضا زیدی کی سربراہی میں اجلاس منعقد ہوا ۔
اجلاس میں ایف پی سی سی آئی، کے سی سی آئی، آل پاکستان شپنگ ایسوسی ایشن، پاکستان شپز ایجنٹس ایسوسی ایشن، وزارت سمندری امور، کراچی پورٹ ٹرسٹ، پاکستان انٹرنیشنل فریٹ فارورڈرز ایسوسی ایشن، آل پاکستان کسٹمز ایجنٹس ایسوسی ایشن اور کراچی کسٹمز ایجنٹس ایسوسی ایشن سمیت تمام متعلقہ اسٹیک ہولڈرز کے نمائندوں نے شرکت کی۔ اجلاس کے تمام شرکاءنے متفقہ طور پر اس بات پر اتفاق کیا کہ تجارتی اور کاروباری برادری کی سہولت کے لیے شپنگ سیکٹر کے لیے ایک ریگولیٹری اتھارٹی بنائی جائے۔
کسٹمز ایجنٹس ایسوسی ایشن (کے سی اے اے ) کے جنرل سیکریٹری نے مزید بتایا کہ قبل از آمد ڈیلیوری آرڈرز کے اجراءسے متعلق تجاویز کے جواب میں آل پاکستان شپنگ ایسوسی ایشن کے نمائندے نے اعلان کیا کہ جن صورتوں میں گڈز ڈیکلریشن (جی ڈی) دائر کیے جاتے ہیں۔ ان میں قبل از آمد ترسیل شپنگ کمپنیوں کی طرف سے پہلے سے احکامات جاری کئےجائیں گے۔ مزید برآں اسٹیٹ بینک آف پاکستان نے یہ بھی یقین دہانی کرائی کہ پاکستان سنگل ونڈو (پی ایس ڈبلیو) کے اقدام کے تحت، وہ اپنے کاموں کو الیکٹرانک طریقے سے انجام دے کر سامان کی کلیئرنس کو تیز کرے گا۔
اس حوالے سے مزید کہا گیا کہکسٹمز ایجنٹس ایسوسی ایشن تجارت میں سہولت کاری کے حوالے سے وزیر اعظم کے ویژن اور مثبت نقطہ نظر کا اعتراف اور تعریف کرتی ہے ۔جبکہ ایسوسی ایشن کئے گئے فیصلوں کو نافذ کرنے میں اپنے تعاون اور تعاون کا بھی یقین دلاتی ہے۔
