رپورٹ: عمران خان

اسلام آباد: ایف آئی اے نے اربوں روپے مالیت کے قیمتی پلاٹوں کی غیرقانونی خریدوفرخت اور الاٹمنٹ اسکینڈل کی تحقیقات میں بڑی کارروائی کرتے ہوئے کیپیٹل ڈیولپمنٹ اتھارٹی کے 4 افسران کو گرفتار کرلیا۔

تفصیلات کے مطابق ڈپٹی ڈائریکٹر ایف آئی اے اینٹی کرپشن سرکل نے اسلام آباد کے مختلف موضع میں ایکوائر کی گئی اراضی کی بنیاد پر غیر متعلقہ لوگوں کو پلاٹ آلاٹ کرنے کے معاملے میں انکوائری کے بعد ثبوت و شواہد سامنے آنے پر مقدمہ درج کر کے سی ڈی اے کے 4 افسران کو گرفتار کر لیا۔

ایف آئی اے کے مطابق گرفتار ملزمان میں آصف علی خان، امداد علی، علی مصطفی اور ارشد محمود شامل ہیں۔ گرفتار ملزمان سی ڈی میں بطور ایڈشنل ڈائریکٹر، ڈپٹی ڈائریکٹر، اسٹیٹ منیجمنٹ آفیسر اور اسسٹنٹ تعینات تھے۔

 ایف آئی اے کا مزید کہنا ہے کہ ملزمان نے کرپشن کرتے ہوئے غیر مستحق افراد کو اسلام آباد کے مختلف سیکٹرز میں 43 پلاٹس الاٹ کئے۔ ملزم نے دیگر ساتھیوں کی ملی بھگت سے اربوں روپے مالیت کی پلاٹس غیر متعلقہ لوگوں کو آلاٹ کئے۔

ایف آئی اے حکام کے مطابق مجموعی طور پر 46 ملزمان کو مقدمے میں نامزد کیا گیا۔ ملزمان کو گرفتار کر کے تفتیش کا آغاز کر دیا گیا۔ جبکہ دیگر ملزمان کی گرفتاری کے لئے چھاپے مارے جا رہے ہیں۔